Die stinkmuishond (Ictonyx striatus) is 'n soogdier en 'n karnivoor wat in die grasvlaktes en oop velde van Suider- en Wes-Afrika voorkom. Die dier se naam is afgelei van die stinkende vloeistof wat dit afskei om vyande mee af te weer.

'n Stinkmuishond se pels is meestal donkerbruin bo en swart onder, maar het prominente wit strepe wat van sy kop tot die punt van sy stert strek. 'n Gemiddelde volwasse stinkmuishond is tussen 50 en 60 cm lank, insluitende 'n 20 cm stert. Die mannetjies weeg gemiddeld 1,4 kg, terwyl die wyfies ongeveer 1 kg weeg.

Hulle vreet hoofsaaklik voëls, muise, groot insekte en ander klein reptiele waarop hulle in die nagtelike ure jag. Om potensiële vyande af te skrik, skei hulle 'n stink vloeistof deur hul anale kliere af. Behalwe vir sy onwelriekende geur, kan die stinkmuishond sy vyande ook vermy deur voor te gee asof dit dood is, of deur bome te klim.

Stinkmuishonde is alleenlopers, maar sal kontak met ander stinkmuishonde tydens die paarseisoen duld. Die wyfie is vir ses weke dragtig en gee tussen September en Desember geboorte aan een tot drie kleintjies. Stinkmuishonde het 'n leeftyd van tussen 13 en 15 jaar.