Nû alrêst lebe ich mir werde
Sît mîn sündic ouge siht
Daz here lant und ouch die erde
Der man sô vil êren giht
Ez ist geschehen, des ich ie bat
Ich bin komen an die stat
Dâ got menischlîchen trat

Schœinu lant, rîch unde hêre
Swaz ich der noch hân gesehen
Sô bist dûz ir aller êre
Waz ist wunders hie geschehen!
Daz ein magt ein kint gebar
Hêre über aller engel schar
Was daz niht ein wunder gar?

Hie liez er sich reine toufen
Daz der mensche reine sî
Dô liez er sich hie verkoufen
Daz wir eigen wurden frî
Anders wæren wir verlorn
Wol dir, sper, kriuze unde dorn!
Wê dir, heiden, daz ist dir zorn!

Dô er sich wolte übr uns erbarmen
Hie leit er den grimmen tôt
Er vil rîche durch uns armen
Daz wir kœmen ûz der nôt
Daz in dô des niht verdrôz
Dast ein wunder alze grôz
Aller wunder übergenôz