1. Vestr komk of ver,
en ek Viðris ber
munstrandar mar,
svá 's mitt of far;
drók eik á flot
við ísabrot;
hlóðk mærðar hlut
munknarrar skut.

2. Buðumk hilmi lǫð
ák hróðrs of kvǫð
berk Óðins mjǫð
á Engla bjǫð;
lofat vísa vann,
víst mærik þann,
hljóðs biðjum hann,
þvít hróðr of fann.

3. Hygg vísi at,
vel sómir þat,
hvé þylja fet,
ef þǫgn of get;
flestr maðr of frá,
hvat fylkir vá,
en Viðrir sá,
hvar valr of lá.

4. Óx hjǫrva glam
við hlífar þrǫm,
guðr óx of gram,
gramr sótti fram;
þar heyrðisk þá,
þaut mækis ǫ́,
malmhríðar spǫ́,
sú‘s mest of lá.

5. Varsa villr staðar
vefr darraðar
fyr grams glǫðum,
geirvangs rǫðum,
þars í blóði
i brimils móði
vǫllr of þrumði,
und véum glumði.

6. (stef). Hné ferð á fit
við fleina hnit.
Orðstír of gat
Eirekr at þat.

7. Fremr munk segja,
ef firar þegja;
frǫ́gum fleira
til frama þeira;
æstu undir
jǫfurs of fundir,
brustu brandar
við bláar randar.

8. Hlam hein-sǫðul
við hjalmrǫðul,
beit bengrefill
þat vas blóðrefill;
frák at felli
fyr fetils svelli
Óðins eiki
í járnleiki.

9. (stef). Þar var eggja at
ok odda gnat.
Orðstír of gat
Eiríkr at þat.

10. Rauð hilmir hjǫr,
þar vas hrafna gǫr,
fleinn sótti fjǫr,
flugu dreyrug spjǫr;
ól flagðs gota
fárbjóðr Skota,
trað nipt Nara
náttverð ara.

11. Flugu hjaldrs tranar
of hræs lanar,
órut blóðs vanar
benmǫ́s granar,
sleit und freki,
en oddbreki
gnúði hrafni
á hǫfuðstafni.

12. (stef) Kom gráðar læ
at gjalpar skæ;
bauð ulfum hræ
Eiríkr of sæ.

13. Lætr snót saka
sverð-Freyr vaka,
en skers Haka
skíðgarð braka;
brustu broddar,
en bitu oddar,
bǫ́ru hǫrvar
af bogum ǫrvar.

14. Beit fleinn floginn,
þá vas friðr loginn,
vas almr dreginn,
varð ulfr feginn;
stózk folkhagi
við fjǫrlagi,
gall ýbogi
at eggtogi.

15. Jǫfurr sveigði ý,
hrutu unda bý;
bauð ulfum hræ
Eiríkr of sæ.

16. Enn munk vilja
fyr verum skilja
skapleik skata,
skal mærð hvata:
verpr ábrǫndum,
en jǫfurr lǫndum
heldr hornklofi,
hann 's næstr lofi.

17. Brýtr bógvita
bjóðr hrammþvita,
munat hodddofa
hringbrjótr lofa;
mjǫk's hǫnum fǫl
haukstrandar mǫl.
Glaðar flotna fjǫl
við Fróða mjǫl.

18. Verpr broddfleti
með baugseti
hjǫrleiks hvati,
hann's baugskati;
þróask hér sem hvar,
hugat mælik þar,
frétt's austr of mar,
Eiríks of far.

19. Jǫfurr hyggi at,
hvé ek yrkja fat,
gótt þykkjumk þat,
es ek þǫgn of gat;
hrœrðak munni
af munar grunni
Óðins ægi
of jǫru fægi.

20. Bark þengils lof
á þagnar rof.
Kannk mála mjǫt
of manna sjǫt;
ór hlátra ham
hróðr berk fyr gram,
svá fór þat fram,
at flestr of nam.