This song was composed when King Henry V and his troops returned to
England from France, after their victory at the Battle of Agincourt, 1415

Deo gratias Anglia, redde pro victoria. (Give thanks England to God for the victory.)

Owre kynge went forth to Normandy,
With grace and myght of chyvalry;
Ther God for hym wrought mervlusly,
Wherfore Englonde may calle and cry,
Deo gratias,
Deo gratias Anglia, redde pro victoria.

He sette a sege, for sothe to say,
To Harflu toune with ryal aray;
That toune he wan and made a fray,
That Fraunce shall rewe tyl domesday.
Deo gratias,
Deo gratias Anglia, redde pro victoria.

Then went owre kynge, with alle his oste,
Thorowe Fraunce for all the Frenshe boste;
He spared for drede of leste, ne most,
Tyl he come to Agincourt coste;
Deo gratias,
Deo gratias Anglia, redde pro victoria.

Than for sothe that knyght comely,
In Agincourt feld he faught manly;
Thorow grace of God most myghty
He had bothe the felde, and the victory;
Deo gratias,
Deo gratias Anglia, redde pro victoria.

Ther dukys, and erlys, lorde and barone,
Were take and slayne, and that wel sone,
And som were ledde in to Lundone
With joye, and merthe, and grete renone;
Deo gratias,
Deo gratias Anglia, redde pro victoria.

Now gratious God he save owre kynge,
His peple and all his welwyllynge,
Gef him gode lyfe and gode endynge,
That we with merth mowe savely synge;
Deo gratias,
Deo gratias Anglia, redde pro victoria.