19 R 20

Pyrsk Chorzowie to co wiym to wom powiym,
trocha alain o sobie i co siedzi w myj głowie.
Jo od bajtla na borsztajnie przesiadywoł z karlusami,
w cingla my grali, o szpilach my godali,
fto groł dobrze, fto sfalył, jak gorole stond pitali,
fto sie klojzdnył na bali, jak bez elwer wygrali.
I od bajtla pamiyntom eR niybieskie na bieli.
Bydziesz kochoł ta drużyna tak mi pedzieli,
łona mo być jak lipsta, jak nojlepszo dziołcha,
mosz jom kochać łod początku do samego końca
i tak robia jak godali niebiyskie moje serce,
choć niy lotom już po placu ze sznojdrym we swyj rynce.
Czos uciyko wszystko mijo to co ważne pozostowo,
z miłościom do Ruchu, tak mnie plac mój wychowoł.
Posuchejcie co wom godom, bo to przeca nojważniyjsze,
jak cztyrnoście my zdobyli, to piytnosty tyż nadejdzie,
cza w to wierzyć jak jo wierza, cza mieć wiary pełne serce,
cza niy myśleć ło porażkach, ale ło tym co nojlepsze
i niy łomać wiary swojyj i łod nowa przeć do przodku,
bo nie ważne co się nosi, ważne to co sie mo w środku,
bo drużyna niy galoty, niy robota, niy fuzekle, niy jak dwa łostatnie piwa,
nie jak z starych garców dekle i niy można się jyj zmieniać jak się komu tak podobo,
wsadźcie se do głowy swojyj co Chorzowski kibic godo.